Մատվիենկոն՝ Ռուբինյանին․ Ռուսաստանը կարող է իր քաղաքացիներին խորհուրդ տալ չայցելել Հայաստան

ՌԴ Դաշնության խորհրդի նախագահ Վալենտինա Մատվիենկոն ԱԺ փոխնախագահ Ռուբեն Ռուբինյանի հետ հեռախոսազրույցում հայտարարել է, որ Ռուսաստանը կարող է իր քաղաքացիներին խորհուրդ տալ չայցելել Հայաստան, եթե շարունակվեն երրորդ երկրների պահանջով ՌԴ քաղաքացիների ձերբակալությունները։

Հեռախոսազրույցի ընթացքում քննարկվել են նաև հայ-ռուսական հարաբերություններն ու միջխորհրդարանական համագործակցությունը։ Մատվիենկոն նշել է, որ Երևանի հայտարարությունները Ռուսաստանի հետ հարաբերությունների պահպանման կարևորության մասին, ըստ իրեն, հաճախ չեն համապատասխանում գործնական քայլերին։

Կողմերը նաև ընդգծել են երկկողմ միջխորհրդարանական հանձնաժողովի աշխատանքների վերսկսման կարևորությունը՝ նշելով, որ դրա հերթական նիստը նախատեսվում է անցկացնել մոտ ժամանակներս։

ՌԴ Դաշնության խորհրդի հաղորդմամբ՝ հեռախոսազրույցը տեղի է ունեցել հայկական կողմի նախաձեռնությամբ։