ՏԵՍԱՆՅՈՒԹ․ Ֆրանսիայում թալանվել են Apple և Lacoste խանութները

Անկարգություններ են տեղի ունեցել ֆրանսիական Ստրասբուրգի կենտրոնում։ Թալանվել են Apple և Lacoste խանութները, գրում է Actu Strasbourg-ը։

Մոտ 50 հոգի մտել ու թալանել է Apple խանութը՝ վերցնելով ցուցադրված բոլոր հեռախոսները։ Նշվում է, որ խանութը չի հասցրել փակել դռները։

Թալանվել է նաև Lacoste խանութը: Twitter-ում տարածվել է տեսանյութ, որտեղ երևում է, թե ինչպես են մարդիկ մտնում ներս ու դուրս գալիս խանութի հագուստներով։

Auroranews.am-ի հետ զրույցում ֆրանսաբնակ հայերից մեկը նշել է, որ երկրում փակվում են բոլոր խանութները։ Սպասվում է, որ առաջիկա օրերին անկարգությունները ավելի կսրվեն, քանի որ ցույցերի պատճառ դարձած սպանությանը հաջորդած առաջին հանգստյան օրերն են։

Ֆրանսիայում զանգվածային անկարգությունները սկսել են այն բանից հետո, երբ Փարիզի Նանտեր արվարձանում ոստիկանը կրակել ու սպանել է Mercedes մեքենա վարող 17-ամյա դեռահասին, որը հրաժարվել է ենթարկվել իրավապահների պահանջներին։ Դատարանը կրակողին կալանավորելու որոշում է կայացրել։

Հունիսի 30-ի գիշերը բերման է ենթարկվել ավելի քան 660 քաղաքացի։ Բերման ենթարկվածների առնվազն մեկ երրորդը երիտասարդներ և անչափահասներ են։

Ինչպես հայտնել էինք՝ Ֆրանսիայում կչեղարկեն ժամանցի միջոցառումները հատկապես վտանգավոր շրջաններում։