Ծանրոց են ուղարկել, որը պայթել է. մահափորձ` «Ռոսսոտրուդնիչեստվո»-ի ղեկավարի դեմ
Կենտրոնաֆրիկյան Հանրապետությունում «Ռոսսոտրուդնիչեստվո»-ի ղեկավար Դմիտրի Սիտիի դեմ մահափորձ է կատարվել։ Նա ավելի վաղ արդեն դիմել է տեղի ոստիկանություն։ Այս մասին «ՌԻԱ Նովոստիին» հայտնել է Կենտրոնաֆրիկյան Հանրապետության ոստիկանության ղեկավար Բենվենյու Զոկուեն:
Ուրբաթ առավոտյան մահափորձից հետո Սիտին հոսպիտալացվել է Բանգիում։ Պայթել է նրան ուղարկված ծանրոցը։
«Ավելի վաղ նա ստացել է սպառնալիքներով առաջին ծանրոցը»,-հայտնել է Զոկուեն։
Կենտրոնաֆրիկյան Հանրապետությունում ՌԴ դիվանագիտական ներկայացուցչությունում ընդգծել են, որ «Ռուսական տան» ղեկավարն ապրում է դեսպանատան սահմաններից դուրս եւ ծանրոցը ստացել է միջազգային առաքման ծառայության միջոցով:
«Պայթյունը տեղի է ունեցել նրա տանը, նա ապրում է դեսպանատնից դուրս։ Նա գնացել է, ստացել ծանրոցը, հավանաբար, DHL-ում, տուն է բերել եւ ինքնուրույն բացել»,-ասել է գործակալության զրուցակիցը։
