«Եթե Ուկրաինան ԵՄ թեկնածուի կարգավիճակ չստանա, ուրեմն Եվրոպան խաբում է Կիևին»․ Կուլեբա

Ուկրաինայի արտգործնախարար Դմիտրի Կուլեբան հայտարարել է, որ եթե Ուկրաինան Եվրամիության անդամի թեկնածուի կարգավիճակ չստանա, դա կնշանակի, որ «Եվրոպան փորձում է խաբել» Կիևին, և Ուկրաինան դա չի հանդուրժի։ Այս մասին հայտնում է ՌԻԱ Նովոստին։

Ավելի վաղ Վլադիմիր Զելենսկին հայտարարել էր, որ Կիևը ԵՄ-ին է փոխանցել հարցաթերթի լրացված երկրորդ մասը՝ Եվրամիությանն անդամակցելու թեկնածուի կարգավիճակ ստանալու համար և հույս ունի հունիսին պատասխան ստանալ Ուկրաինայի թեկնածուի կարգավիճակի վերաբերյալ:

«Եթե մենք թեկնածուի կարգավիճակ չստանանք, դա միայն մի բան կնշանակի՝ Եվրոպան փորձում է մեզ խաբել։ Եվ մենք չենք պատրաստվում հանդուրժել դա»,-հայտարարել է Կուեբան Financial Times թերթին տված հարցազրույցում։

Մեկնաբանելով Ֆրանսիայի նախագահ Էմանուել Մակրոնի կանխատեսումն այն մասին, որ ԵՄ-ին Ուկրաինայի անդամակցության գործընթացը կարող է մի քանի տարի, նույնիսկ տասնամյակներ տևել` Կուլեբան հայտարարել է, որ Ուկրաինայի համար ամենակարևորը հունիսին թեկնածուի կարգավիճակ ստանալն է, և այդ ժամանակ արդեն հնարավոր կլինի «լուծել մնացած հարցերը՝ ինչպես, երբ և այլն»:

«Երեք ամիս առաջ այս երկիրը անդամության հեռանկար անգամ չուներ։ Իսկ հիմա նրանք քննարկում են, թե դա որքան ժամանակ կտևի»,-ավելացրել է Կուլեբան։

Հիշեցնենք՝ Զելենսկին փետրվարի 28-ին ստորագրել է ԵՄ-ին Ուկրաինայի անդամակցության հայտը։