«Ներկ չեն լցրել»․ ՌԴ դեսպանը մանրամասներ է հայտնել Լեհաստանում տեղի ունեցած միջադեպի վերաբերյալ
Լեհաստանում ՌԴ դեսպան Սերգեյ Անդրեևի վրա ոչ թե ներկ են լցրել, այլ օշարակ։ Նա Վարշավայում տեղի ունեցած միջադեպի մանրամասները պատմել է «Ռոսիա 24»-ի եթերում։
Ավելի վաղ հայտնել էինք, որ Վարշավայում Անդրեևի վրա կարմիր ներկ են լցրել, երբ նա ծաղկեպսակ է դրել խորհրդային զինվորների գերեզմանատանը։
«Մեր աշխատակիցներից ոչ ոք առանձնապես չի տուժել` չհաշված, որ մեզ վրա օշարակ շաղ տվեցին»,- ասել է դիվանագետը։
Նա նշել է, որ իրենց վրա լցված նյութը քաղցր համ է ունեցել, դրանից էլ եզրակացրել են, որ օշարակ է:
Դեսպանի խոսքով` ի սկզբանե ավելի լայն միջոցառումների ցանկ էր նախատեսված, սակայն Լեհաստանի ԱԳՆ-ն ռուսական կողմին խորհուրդ է տվել զերծ մնալ դրանցից` վկայակոչելով քրեական օրենսգիրքը, որն արգելում է ատելության, պատերազմի, ֆաշիստական կամ տոտալիտար ռեժիմի քարոզչությունը։
Ռուսական կողմը նման հայտարարություններն անհեթեթություն է համարել, սակայն որոշել է հրաժարվել միջոցառումներից և սահմանափակվել ծաղիկների դնելով։ Դիվանագետի խոսքով` տարածքում ոստիկան չի եղել, այնինչ միջոցառումների ժամանակ պետք է իրավապահները կարգուկանոն ապահովեին։
Երբ դեսպանը ինքը տեղ է հասել, տեսել է, որ հուշարձանի մոտ մի քանի հարյուր մարդ կա, ընդ որում` ագրեսիվ տրամադրված։ Նրանք «զինված» են եղել պաստառներով, բարձրախոսներով։
«Եվ երբ ես, կինս և մեր աշխատակիցներից մի քանիսը փորձեցինք գնալ հուշարձանի մոտ՝ ծաղկեպսակ դնելու, նրանք ուղղակի փակեցին մեր ճանապարհը, շրջապատեցին, հետո աղմուկ ու աղաղակ բարձրացրին, սկսեցին վիրավորել, մեզ վրա օշարակ լցրին, և միայն 10 րոպե հետո եկան ոստիկանները... Երբ հասկացանք, որ մեզ թույլ չեն տալու հասնել հուշարձանին, ստիպված վերադարձանք գերեզմանատան մուտքի մոտ, այնտեղ թողեցինք մեր ծաղկեպսակը, և միայն այդ ժամանակ ոստիկանները լավ թե վատ ապահովեցին մեկ մեկնումը»,- ասել է դիվանագետը։
Նրա խոսքով` իրավապահները չեն կարողացել մեկնումն էլ նորմալ ապահովել, որովհետև մարդիկ հարվածել են մեքենաներին, պոկել համարանիշը։
