Գերմանիան հայտնել է կառավարական կայքերի դեմ ռուս հաքերների հարձակումների մասին

Ռուս հաքերները մի շարք DDoS հարձակումներ են իրականացրել Գերմանիայի կառավարական կայքերի վրա, հաղորդում է dpa գործակալությունը՝ հղում անելով Der Spiegel պարբերականին: Մասնավորապես, հարձակման են ենթարկվել պաշտպանության նախարարության, բունդեսթագի, դաշնային ոստիկանության եւ մի շարք դաշնային հողերի ոստիկանական ծառայությունների պորտալներ: Բացի այդ, ժամանակավորապես անհասանելի է եղել կանցլեր Օլաֆ Շոլցի կայքը: 

Հարձակումների պատասխանատվությունն ստանձնել են Killnet ռուսական միավորման հաքերները, որոնք համապատասխան հաղորդագրությունը  հրապարակել են Telegram-ի իրենց ալիքում: Spiegel-ի տվյալներով՝ դա արվել է որպես բողոքի նշան Ուկրաինային զենք մատակարարելու դեմ: 

Տեղեկատվական անվտանգության դաշնային վարչությունը հայտնել է, որ նման հարձակումները տեխնոլոգիական տեսանկյունից այնքան էլ բարդ չեն եւ հեշտությամբ կարող են հետ մղվել ստանդարտ տոխնոլոգիաների օգնությամբ: