«Մարիուպոլում տասնյակ հազարավոր զոհեր կան». Զելենսկին հայտարարել է նաև, որ ՌԴ-ն նախածեռնում է լայնածավալ հարձակում

 Հաջորդ շաբաթ ռուսական զորքերը կարող են է՛լ ավելի լայնածավալ գործողությունների անցնել Ուկրաինայի արևելքում: Այս մասին հայտարարել է Ուկրաինայի նախագահ Վլադիմիր Զելենսկին՝ հերթական տեսաուղերձում։ 

«Նրանք կարող են ավելի շատ հրթիռներ, ռումբեր օգտագործել մեր դեմ, բայց մենք պատրաստ ենք այս գործողություններին, պատասխան կտանք, էլ ավելի ակտիվ կլինենք Ուկրաինա զենք մատակարարելու հարցում, միջազգային ասպարեզում, ինչպես նաև՝ տեղեկատվական հարթակում»,- ասել է նա։

Այսօր` ապրիլի 11-ին,  Հարավային Կորեայի խորհրդարանում տեսակապով  ելույթի ընթացքում ևս Զելենսկին ներկայացրել է երկրում տիրող իրավիճակը: Մասնավորապես նա անդրադարձ է կատարել Մարիուպոլում տեղի ունեցող իրավիճակի և զարգացումների մասին: Նա նշել է, որ քաղաքում տեղի ունեցած մարտերի ընթացքում տասնյակ հազարավոր մարդիկ են զոհվել։

«Ամենավատ իրավիճակը Մարիուպոլում է՝ մեր հարավային նավահանգստային քաղաքում, որը մարտի 1-ից արգելափակված է ռուսական զորքերի կողմից։ Կես միլիոնանոց քաղաք էր։ Զավթիչները փակել են այն և թույլ չեն տալիս այնտեղ ջուր և սնունդ տանել։ Նրանք փորձել են գրավել այն ամենադաժան ձևով` պարզապես ոչնչացնել այն ամենը, ինչ կա քաղաքում: Մարիուպոլն ավերվել է, կան տասնյակ հազարավոր մահացածներ»,- ասել է Զելենսկին՝ հավելելով, որ Ռուսաստանը ցանկանում է ցուցադրաբար ոչնչացնել Մարիուպոլը։

Նա կարծիք է հայտնել, որ արեւմտյան զենքի մատակարարման օգնությամբ Ուկրաինան կկարողանա ազատել «բազմաչարչար Մարիուպոլը» և փրկել մյուս պետություններին ռուսական ագրեսիայից: