ՏԵՍԱՆՅՈՒԹ. Բրյուսելում բանակցությունների արդյունքում երկու որոշում է կայացվել

 Նիկոլ Փաշինյանը Կառավարության այսօրվա նիստում մանրամասներ հայտնեց երեկ՝ Բրյուսելում կայացած իր, Ադրբեջանի նախագահ Ալիևի և ԵՄ նախագահ Շառլ Միշելի եռակողմ հանդիպումից:

Նիկոլ Փաշինյանի հաղորդմամբ՝ Բրյուսելում բանակցությունների արդյունքում երկու որոշում է կայացվել՝ երկու երկրների միջև սկսել խաղաղության բանակցությունների նախապատրաստական աշխատանքները, ինչպես նաև մինչև ապրիլի վերջ ստեղծել Հայաստանի և Ադրբեջանի միջև սահմանների դելիմիտացիայի հարցերով երկկողմ հանձնաժողով:

Փաշինյանը մանրամասնեց, որ Հայաստանի և Ադրբեջանի արտգործնախարարներին հանձնարարվել է սկսել ապագա խաղաղության պայմանագրի նախապատրաստական աշխատանքները և այս ուղղությամբ ձեռնարկել բանակցություններ.

«Սա նշանակում է, որ խաղաղության պայմանագրի վերաբերյալ Հայաստանի և Ադրբեջանի ներկայացրած սկզբունքները պետք է ի մի բերվեն և բանակցությունների արդյունքներով հասցեագրվեն: Ես արդեն բարձրաձայնել եմ այս առնչությամբ մեր նկատառումները և տեղյակ եք, որ ի պատասխան Ադրբեջանի առաջարկների, մենք ընդգծել ենք, որ դրանցում մեզ համար անընդունելի ոչինչ չկա, սակայն դրանք չեն ամբողջացնում խաղաղության օրակարգի հարցերը, և մեզ համար սկզբունքային նշանակություն ունի ԼՂ ժողովրդի անվտանգության երաշխիքները, նրանց իրավունքների և ազատությունների պաշտպանությունը, ինչպես նաև ԼՂ վերջնական կարգավիճակի ճշգրտումը, այս հարցերը ընդգրկված են խաղաղության օրակարգի վերաբերյալ մեր պատասխաններում և պետքէ դառնան բանակցությունների առարկա»,-ասաց Փաշինյանը և ընդգծեց, որ այս գործընթացում կարևորում է ԵԱՀԿ Մինսկի խմբի ներգրավվածությունը և պետք է շարունակենք աշխատել այս ուղղությամբ:

Նիկոլ Փաշինյանի հաղոդրմամբ՝ Բրյուսելյան այցի ժամանակ որոշվել է նաև Հայաստան-Ադրբեջան սահմաններին դելիմիտաիայի և դեմարկացիայի հարցերով երկկողմ հանձնաժողով ստեղծել: Նա նշեց, որ հանձնաժողովը կունենա կրկնակի մանդատ՝ բուն դելիմիտացիայի աշխատանքներ իրականացնելու և սահմանի երկայնքով կայունություն հաստատելու համար: