ՏԵՍԱՆՅՈՒԹ. Ադրբեջանը փորձում է ԼՂ-ի և Հայաստանի դեմ լայնամասշտաբ հարձակման լեգիտիմություն ձևավորել. Փաշինյան

2022թ-ի մարտի 28-ի ՀՀ ԱԽ հայտարարության մեջ շեշտադրվում է, որ Ադրբեջանը Լեռնային Ղարաբաղի ուղղությամբ նոր սադրանքներ և հարձակում ձեռնարկելու մտադրություն ունի, արձանագրել էինք, որ նման զարգացումների բավական մեծ հավանականություն կա նաև Հայաստան-Ադրբեջան սահմանին: Այս մասին Կառավարության նիստին հայտարարեց ՀՀ վարչապետ Նիկոլ Փաշինյանը.

«Ինչպես 2020թ-ի 44-օրյա պատերազմից առաջ, դրա ընթացքում, ինչպես նաև դրանից հետո Ադրբեջանը վարում է Հայաստանի և ԼՂ-ի դեմ ռազմական հարձակումը հիմնավորող խոսույթի, բովանդակության, ձևավորման քաղաքաքականություն: Նա դիվանագիտական և հանրային հարթակ է նետում թեզեր, առաջարկություններ, ապա Հայաստանին մեղադրում է դրանց չարձագանքելու կամ ապակառուցողական ձևով արձագանքելու, կամ մերժելու մեջ: Հայաստանին վերագրում է ինչ-որ խոստումներ, բանահյուսում ինչ-որ պայմանավորվածություններ, հետո այս խոսույթի համատեքստում Հայաստանին վերագրում է ապակառուցողականություն, մերժողականություն, խոստումները չկատարելու, պայմանավորվածությունները չկատարելու գործելակերպ, այս մեղադարքնի վրա կառուցում է ագրեսիվ հռետորաբանություն, որին հաջորդում են ագրեսիվ գործողություններ, որոնք արդարացվում են վերը նկարագրված խոսույթով և ձևակերպումներով»,-հայտարարեց Փաշինյանը:

Նիկոլ Փաշինյանի խոսքով՝ Ադրբեջանի այս գործելակերպը շարունակվում է նաև հիմա, ըստ նրա՝ Ադրբեջանը սրանով փորձում է Լեռնային Ղարաբաղի և Հայաստանի դեմ լայնամասշտաբ հարձակման լեգիտիմություն ձևավորել: