Ադրբեջանի նախագահ Իլհամ Ալիևը և Թուրքիայի նախագահ Ռեջեփ Թայիփ Էրդողանը հեռախոսազրույց են ունեցել։ Այս մասին ասվում է Ադրբեջանի նախագահի մամուլի ծառայության տարածած տեղեկատվության մեջ։

Ալիևի կողմից նախաձեռնած զրույցի ընթացքում խոսվել է ապրիլի 6-ին Բրյուսելում Եվրոպական խորհրդի նախագահ Շառլ Միշելի նախաձեռնությամբ և մասնակցությամբ Եվրամիություն, Ադրբեջան և Հայաստան եռակողմ հանդիպման մասին։

Ալիևը դրական է գնահատել հանդիպման արդյունքները։ Նա ընդգծել է Հայաստանի և Ադրբեջանի միջև խաղաղության պայմանագրի նախապատրաստման աշխատանքային խմբի ստեղծման վերաբերյալ ընդունված որոշումները՝ Ադրբեջանի կողմից ներկայացված հիմնարար սկզբունքների ներառմամբ, այդ թվում՝ տարածքային ամբողջականության փոխադարձ ճանաչումը և տարածքային պահանջներից հրաժարումը, ինչպես նաև սահմանազատման հանձնաժողովի ստեղծումը։

Էրդողանն իր հերթին նույնպես գոհունակություն է հայտնել ձեռք բերված արդյունքներից։