«Օրենքով գող» հասկացությունը սահմանված է, նրանց դեմ պայքարը սկսված. Բադասյան
Քրեական աստիճանակարգության բարձրագույն աստիճան ունեցող անձանց դեմ պայքարելու համար մենք ունենք մշակած ռազմավարություն` բավական համբերատար, հերթական քայլերով պայքարելու ենք նրանց դեմ: Այս մասին լրագրողների հետ զրույցում հայտարարեց արդարադատության նախարար Ռուստամ Բադասյանը:
Հարցին՝ հիմա ՔԿ-ներում կա՞ն «օրենքով գողեր» և քրեական հեղինակություններ և արդյո՞ք վերացված է նրանց ազդեցությունը, Բադասյանն ասել է . «Այո, կան այդպիսի անձինք: Եթե անկեղծ ասեմ՝ նրանց ազդեցությունն ամբողջապես վերացված չէ, սակայն գործնականում քայլեր կատարված են»:
Նա նշեց, որ քրեակատարողական համակարգում կան խորքային խնդիրներ: «Բազմիցս ասել ենք, որ կան նման ինստիտուտներ և որ նրանք ունեն ազդեցություն ՔԿՀ-ների ներսում: Նաև ասել ենք, որ գործնականում էլ կատարել ենք քայլեր, որ հասնենք նրան, որ ՔԿՀ-ներում լինի միայն օրենքի գերակայություն»,-նշել է նա:
Հարցին էլ՝ արդյոք նախարարը հիշո՞ւմ է մի դեպք, երբ «Նուբարաշեն»-ում կամ այլ ՔԿՀ-ում հրավառ նյութեր նետեն, նման կարգի զանգվածային անկարգություններ լինեն, արդյոք դա պայմանավորված չէ՞ քրեական հեղինակությունների դեմ օրինագծով, Բադասյանը նշել է , որ տպավորություն է, թե ինչ-որ շարունակական պրոցեսի մասին են խոսում. «Անկարգություններ եղել են, դրանք դադարեցվել են և հիմա որևէ նախադրյալ չկա, որ նորից կսկսեն անկարգություններ»:
Իսկ թե ինչպես պետք է որոշեն քրեական աստիճանակարգության բարձրագույն աստիճան ունեցող անձանց կամ ինչպես ընդունված է ասել՝ «օրենքով գողերին», Բադասյանը հավաստիացրել է, որ քրեական գործի միջոցով. «Այսինքն՝ իրավապահ մարմինները պետք է հավաքեն ապացույցներ, որով էլ դիսպոզիցիայով նկարագրված արարքը կհաստատվի կամ կհերքվի: Եթե նկատի ունենք, որ պրակտիկայում դա հնարավոր չէ որոշել՝ ոչ, հնարավոր է, միջազգային փորձն էլ է վկայակոչվել, տարբեր երկրներում կիրառվել է»:
Նա նշեց, որ բավական բարդ ապացուցողական բազա է պահանջվում, սակայն քրեական աստիճանակարգության բարձրագույն աստիճան ունեցող անձ հասկացությունը սահմանված է:
