Թուրքիան և Մեծ Բրիտանիան մոտ են միլիարդավոր դոլարների ռազմական գործարքի կնքմանը

Բրիտանական Middle East Eye պարբերականի տեղեկացմամբ՝ Թուրքիայի և Մեծ Բրիտանիայի միջև առաջիկա բարձր մակարդակի հանդիպման ընթացքում նախատեսվում է կնքել միլիարդավոր դոլարների ռազմական գործարք։

Հավելենք՝ Անկարայում տեղի կունենա Մեծ Բրիտանիայի վարչապետ Քիր Սթարմերի և Թուրքիայի նախագահ Ռեջեփ Թայիփ Էրդողանի հանդիպումը, որի արդյունքներով նախատեսվում է վերջնականացնել «Eurofighter» կործանիչների ձեռքբերման վերաբերյալ համաձայնագիրը։

Թուրքական աղբյուրների փոխանցմամբ՝ նախքան Սթարմերի այցը Անկարա, Մեծ Բրիտանիան արդեն ուղարկել է երկու միավոր «Eurofighter» կործանիչ՝ որպես համաձայնության խորհրդանշական հաստատում։

Հիշեցնենք, որ Թուրքիան եվրոպական կործանիչների գնման շուրջ բանակցությունները սկսել էր 2023-ին։ 2025-ի հուլիսին կողմերը նախաստորագրել էին 40 միավոր «Eurofighter» գնելու վերաբերյալ համաձայնագիր, սակայն գործարքի արժեքը և մի շարք տեխնիկական մանրամասներ դեռևս չէին հստակեցվել։