«Վիզաների ազատականացման գործընթացը ՀՀ-ի հետ ընթանում է արագ տեմպերով». Արարատ Միրզոյան
ԱԳ նախարարի խոսքով՝ Հայաստանը և ԵՄ-ն մոտ են գործողությունների պլանի համաձայնեցմանը, իսկ նոր ճանապարհային քարտեզը գրեթե ամբողջությամբ բանակցված է:
Արտաքին գործերի նախարար Արարատ Միրզոյանը ԱԺ-ում 2026 թվականի պետական բյուջեի նախնական քննարկման ժամանակ հայտարարել է, որ Հայաստանի և Եվրոպական միության միջև վիզաների ազատականացման գործընթացը ընթանում է բավականին արագ։ «Կարծում եմ՝ ՀՀ-ի հետ առանց վիզայի ռեժիմի հաստատման գործընթացն ավելի արագ է զարգանում, քան մի շարք այլ երկրների դեպքում։ Հուսով եմ՝ շատ մոտ ապագայում կտեսնենք գործողությունների համաձայնեցված պլանը և կանցնենք իրագործման փուլին»,– նշել է նախարարը։
Միրզոյանի խոսքով՝ ՀՀ–ԵՄ նոր ճանապարհային քարտեզը 99,9 տոկոսով արդեն բանակցված է, և երկկողմ հարաբերությունները զարգանում են «գերինտենսիվ» տեմպերով։ «Երբեմն պայմանավորվածություններ ենք ձեռք բերում որոշ ծրագրերի շուրջ, բայց հարաբերությունների խորացման շնորհիվ դրանք շատ արագ դառնում են ոչ արդիական, և նոր՝ ավելի առաջադեմ ձևաչափեր են անհրաժեշտ»,– հավելել է նա։
Նախարարը նաև ընդգծել է, որ Հայաստանի եվրոպական ուղղությամբ ակտիվացումը չի հակասում հավասարակշռված արտաքին քաղաքականությանը․ «ԵՄ ընտանիքին մոտենալը չի նշանակում մյուս գործընկերներից հեռանալ։ Հայաստանը շարունակելու է պահել հավասարակշռված և բազմավեկտոր քաղաքականություն»։
