Սանդու․ Ռուսաստանը կփորձի վերահսկել իշխանությունը Հայաստանում
Մոլդովայի նախագահ Մայա Սանդուն հայտարարել է, որ Ռուսաստանը վերանայում է իր արտաքին քաղաքական ռազմավարությունը և փորձում է ազդել այն երկրների վրա, որտեղ առաջիկայում սպասվում են ընտրություններ։ Նրա խոսքով՝ այս գործընթացի շրջանակում Մոսկվան կարող է փորձել վերահսկողություն հաստատել Հայաստանի ներքաղաքական գործընթացների նկատմամբ։
«Ռուսաստանը չի սպասել նման արդյունքների և այժմ փորձում է վերանայել իր պլանները։ Նրանք կկենտրոնանան այն պետությունների վրա, որտեղ ընտրություններ են սպասվում։ Օրինակ՝ Հայաստանում ընտրությունները կկայանան հաջորդ տարի, և նրանք կփորձեն վերցնել իշխանության վերահսկողությունը»,- նշել է Սանդուն՝ Rock FM ռումինական ռադիոկայանին տված հարցազրույցում։
Նա հավելել է, որ Ռուսաստանը մի շարք եվրոպական երկրներում՝ ներառյալ Ռումինիայում, Ֆրանսիայում և Գերմանիայում, կիրառում է քարոզչության և ապատեղեկատվության գործիքներ, ինչը, ըստ նրա, շատ ավելի դժվար է նկատել սովորական քաղաքացիների համար։
Սանդուի հայտարարությունները մեծ արձագանք են ստացել միջազգային մամուլում՝ ընդգծելով աճող մտահոգությունները Ռուսաստանի ազդեցության քաղաքականության վերաբերյալ Եվրոպայում և Հարավային Կովկասում։
