Այս քաղաքականությամբ ԵՄ անդամ չեք դառնա նույնիսկ 2030-ին․ ԵՄ հանձնակատարը՝ Վրաստանին

Եվրամիության ընդլայնման հարցերով հանձնակատար Մարտա Կոսը վրացական «Պիրվելի» թերթին տված հարցազրույցում հայտարարել է, որ Վրաստանի անդամակցությունը ԵՄ-ին մինչև 2030 թվականը անիրատեսական է, եթե իշխանությունը շարունակի ներկայիս քաղաքական գիծը։

«Մենք գիտենք, որ Վրաստանի իշխանությունները պնդում են՝ երկիրը կդառնա ԵՄ անդամ մինչև 2030 թվականը, սակայն դա անհնար կլինի։ «Վրացական երազանքի» քաղաքականությունը չի աշխատի», – նշել է Կոսը։

Նա նաև հայտնել է, որ Եվրամիությունը մշակում է առանց վիզայի ռեժիմը կասեցնելու նոր մեխանիզմ, որը կընդունվի նոյեմբերին։ Դրանից հետո, ըստ նրա, Բրյուսելը կքննարկի Վրաստանի հետ համագործակցության տարբեր սցենարներ՝ կախված կառավարության արձագանքից։

««Վրացական երազանքը» պետք է ավելի ուշադիր նայի, թե ինչ ենք մենք անում Եվրոպայում, և լսի մեր հստակ ազդանշանները», - ընդգծել է Կոսը։

ԵՄ-ի այս հայտարարությունը վկայում է Վրաստանի եվրոպական ինտեգրման գործընթացի նկատելի լճացման մասին՝ պայմանավորված ներքաղաքական զարգացումներով և արևմտյան գործընկերների աճող դժգոհությամբ։