Լիտվան փակել է Բելառուսի հետ սահմանը՝ Մինսկին մեղադրելով սադրանքների մեջ
Լիտվայի վարչապետ Ինգա Ռուգինիենեն հայտարարել է, որ կառավարությունը որոշել է փակել Բելառուսի հետ սահմանը՝ արձագանքելով վերջին շաբաթվա ընթացքում արձանագրված մի շարք միջադեպերին։
Վարչապետի խոսքով՝ միայն անցած շաբաթ Լիտվայի օդանավակայանները չորս անգամ ստիպված են եղել դադարեցնել աշխատանքը մաքսանենգ ծխախոտով բեռնված օդապարիկների պատճառով, որոնք, ըստ լիտվական կողմի, բաց են թողնվել Բելառուսի տարածքից։ Դրա հետևանքով չեղարկվել է ավելի քան 140 չվերթ։
«Սա հստակ ազդանշան է Բելառուսին՝ հիբրիդային հարձակումները Լիտվայի դեմ անընդունելի են և չեն հանդուրժվի»,- ընդգծել է Ռուգինիենեն։
Նա հավելել է, որ Լիտվայի զինված ուժերը կստանան հրահանգ՝ խոցելու նման օդապարիկները, իսկ սահմանային հսկողությունը կուժեղացվի՝ կանխելու հնարավոր նոր միջադեպեր։
