Հայաստանը չի պատրաստվում բանակցել Ադրբեջանի առաջադրած պայմաններով. Միրզոյան

ԱԳ նախարարը նշեց, որ Հայաստանը պատրաստ է անհապաղ սկսել խորհրդակցություններ՝ առանց Ադրբեջանի առաջադրած պայմանների ընդունման:

Հայաստանի և Ադրբեջանի միջև խաղաղության պայմանագրի ստորագրման հարցով դեռևս չկա համաձայնեցված ամիս, ամսաթիվ կամ վայր։ Այս մասին լրագրողների հետ զրույցում հայտնել է արտաքին գործերի նախարար Արարատ Միրզոյանը։

«Մենք հայտնել ենք, որ պատրաստ ենք օր առաջ սկսել խորհրդակցություններ ադրբեջանական կողմի հետ՝ պայմանագրի ստորագրման վայրի և ժամկետի շուրջ։ Բայց որևէ ֆիքսված պայմանավորվածություն այս պահին չկա»,– ասել է Միրզոյանը։

Նախարարը ընդգծել է, որ հայկական կողմը չի ընդունում Ադրբեջանի առաջադրած պայմանները․ «Գաղտնիք չէ նաև ադրբեջանական կողմի մեկնաբանությունը և դրա հետ կապված պայմանը։ Մենք դա չենք ընդունում և չենք համարում քննարկելի օրակարգ»։

Միրզոյանը հույս է հայտնել, որ գործընթացը առաջիկայում կշարունակվի կառուցողական հունով, և հնարավոր կլինի հասնել փաստաթղթի ստորագրմանը։ Նրա խոսքով՝ դեռ առկա են բազմաթիվ աշխատանքային ուղղություններ՝ սկսած սահմանազատումից մինչև հումանիտար հարցեր և գերիների վերադարձ։