Որսագողը. ոստիկանությունը փաստեր է անտեսում
«Հուլիսի 18-ին, ժամը 11.30-ին, ոստիկանության Նոյեմբերյանի բաժնում ստացվել են Վանաձոր քաղաքի Աբովյան փողոցի 45-ամյա մի բնակչի կողմից ապօրինի որս կատարելու վերաբերյալ նախապատրաստված նյութերը, հաղորդում է Econews.am-ը:
Համացանցում հրապարակված հոդվածի համաձայն՝ ուսումնասիրվել են վանաձորցու սոցիալական էջի բաց տվյալները, որոնց արդյունքում արձանագրվել են ապօրինի որսի մասին վկայող տվյալներ:
Վանաձորցին Գուգարքի բաժնում բացատրություն է տվել, որ 2014 թվականի ամռանը, Նոյեմբերյան քաղաքի հարակից անտառում հանդիպել է անծանոթ երկու որսորդի, որոնց մոտ առկա սպանված այծյամի հետ ինքը եւ որդին լուսանկարվել են: Անծանոթ որսորդները նրան հայտնել են, որ այծյամին սպանել են իրենք՝ նույն անտառում:
Ոստիկանության Նոյեմբերյանի բաժնի ծառայողների ձեռնարկած միջոցառումների շնորհիվ հուլիսի 25-ին 45-ամյա վանաձորցին արդեն բացատրություն է տվել, որ 2015 թ. ամռանը Նոյեմբերյանի վարչական տարածքում գտնվող «Ձիարածի ուրթ» կոչվող հանդամասում իր անվամբ հաշվառված ողորկափող որսորդական հրացանով այծյամին սպանել է ինքը, որից հետո լուսանկարվել է»,- հայտնում է ՀՀ ոստիկանության մամուլի ծառայությունը՝ անդրադառնալով EcoNews.am-ի հրապարակմանը:
Հիշեցնենք, որ EcoNews.am բնապահպանական տեղեկատվական կայքն ահազանգել է Գեւորգ Ավետյան եւ Արամ Ջուլհակյան անունով քաղաքացիների կողմից կատարված որսագողության դեպքերի մասին:
Թեպետ, ոստիկանության պաշտոնական հաղորդագրության մեջ ասվում է միայն սպանված այծյամի մասին, մեր կողմից հրապարակված լուսանկարները վկայում են ապօրինի որսի մի քանի դեպքերի մասին, մասնավորապես ապանվել է նաեւ լուսան (Lynx), գորշուկ (Meles meles), նապաստակ եւ այլն: Եվս մեկ անգամ ընդգծենք, որ վերոնշյալ կենդանիների որսը եւս թույլատրված չէ, ուստի եւս հանդիսանում է ապօրինի որսի մասին վկայող ապացույց: Հորդորում ենք ՀՀ ոստիկանությանը քայլեր ձեռնարկել նաեւ նշված կենդանատեսակների որսի հանգամանքները պարզելու ուղղությամբ:
Ուշագրավ է նաեւ, որ ոստիկանության հաղորդած տվյալների համաձայն՝ ապօրինի որսը կատարվել է օրինական ողորկափող որսորդական հրացանով, ինչը նշանակում է, որ նշված անձը հանդիսանում է որսորդական միության անդամ:
Որսի ոլորտում ստեղծված իրավիճակին անդրադարձել ենք բազմիցս։ Ըստ մեր կատարված ուսումնասիրության՝ ՀՀ որսի ոլորտի նկատմամբ եւս բացակայում է պատշաճ մակարդակի վերահսկողություն, իսկ որսորդական միասնական վկայական ստանալու կարգի ոչ լիարժեքության, «Որսի եւ որսորդական տնտեսության վարման մասին» ՀՀ օրենքով սահմանվող որսորդական մինիմում հանձնելու պրակտիկայի ի սպառ բացակայության, մի շարք այլ ընթացակարգային խնդիրների հետեւանքով ոլորտում ստեղծվել է քաոսային իրավիճակ, ինչի պատասխանատուն առաջին հերթին պետական լիազոր մարմինն է, որը գրեթե 10 տարի շարունակ պատշաճ կերպով չի իրականացրել իր լիազորություններն ու պարտականությունները։
