Այսօր ՀՀ վարչապետի պաշտոնակատար Նիկոլ Փաշինյանը Դիլիջանում անդրադարձավ ապագա կառավարության կազմին` նշելոով, որ նախարարների կարգավիճակում շատ մեծ անակնկալներ չեն լինելու։ Փաշինյանը ընդգծեց, որ մեծ է հավանականությունը, որ նոր կառավարության կառուցվածքում սփյուռքի նախարարություն չենք ունենա։ «Մենք հիմա քննարկումների փուլում ենք։ Մեր ամենակարեւոր խնդիրը պետական կառավարման համակարգում կառավարման առավել արդյունավետ մակարդակի հասնելն է, այդ թվում՝ սփյուռքի հետ հարաբերություններում։ Այո՛, կա այդպիսի հավանականություն եւ բավականին մեծ է այդ հավանականությունը, որ նոր կառավարության կառուցվածքում սփյուռքի նախարարություն չենք ունենա, բայց դա չի նշանակում, որ մենք այլ կառույցների միջոցով այդ կապերն արդյունավետ չենք դարձնի»,- նշեց նա։ Հիշեցնենք՝ ավելի վաղ հայտնել էինք, որ կառավարության կառուցվածքում առաջիկայում փոփոխություններ են լինելու: Օպտիմալացվելու է նախարարությունների թիվը: Քննարկվում է մի քանի նախարարությունների միավորման, սփյուռքի նախարարության լուծարման հարցը։