Գագիկ Ծառուկյանին վաղը կրկին կհարցաքննեն

ԲՀԿ առաջնորդ Գագիկ Ծառուկյանը վաղը՝ հուլիսի 24-ին, կրկին հրավիրվել է հարցաքննության ՀՀ ՊԵԿ քննչական վարչություն։ Այս մասին հայտնել է ԲՀԿ խոսնակ Իվետա Տոնոյանը։

«Վաղը՝ ժամը 10:30-ին, Գագիկ Ծառուկյանը կրկին հրավիրվել է հարցաքննության ՀՀ ՊԵԿ քննչական վարչություն (հասցե՝ ք. Երևան, Դեղատան 3)»,- նշել է նա։

Հիշեցնենք` Ծառուկյանի նախորդ հարցաքննությունը տևել էր շուրջ 10 ժամ։ Փաստաբանների փոխանցմամբ՝ այդ ընթացքում տեղի էր ունեցել առերեսում՝ իրանցի քաղաքացու հետ, որը գործով տուժող է ճանաչվել։ 

Ծառուկյանի պաշտպանները հայտնել էին, որ առերեսման ընթացքում իրենք բազմաթիվ հարցեր են ուղղել իրանցի քաղաքացուն, սակայն հստակ պատասխաններ չեն ստացել:

Գագիկ Ծառուկյանին մեղադրանք է առաջադրվել առանձնապես խոշոր չափերով խարդախության և փողերի լվացման հոդվածներով, իսկ նրա պաշտպանները մեղադրանքները անհիմն են համարում։