ԱՄՆ-ն մերժում է Թուրքիային. F-35 կործանիչներ չեն լինի, քանի դեռ չեն հրաժարվել ռուսական Ս-400-ներից

ԱՄՆ Պետքարտուղարությունը Կոնգրեսին ուղարկած նամակում հստակ հայտարարել է․ Թուրքիան չի ստանա F-35 կործանիչներ, քանի դեռ չի հրաժարվել ռուսական Ս-400 զենիթահրթիռային համակարգերից և չի կատարել ամերիկյան օրենքների մյուս պահանջները։ Այս մասին հայտնում է թուրքական ԶԼՄ-ները:

Չնայած ԱՄՆ նախագահ Դոնալդ Թրամփի հայտարարություններին, թե հնարավոր է պատժամիջոցները հանվեն և Թուրքիային վաճառվեն այդ ինքնաթիռները, օրենքով սահմանված արգելքները շարունակում են գործել։

Ամերիկյան օրենսդրությունն արգելում է Թուրքիային F-35 փոխանցել, քանի դեռ նա չի կատարել CAATSA («Պատժամիջոցների միջոցով Ամերիկայի հակառակորդներին հակազդելու մասին») օրենքի պահանջները։

Հիմնական պայմաններն են՝

 Հրաժարվել ռուսական Ս-400 համակարգերից և դրանց սարքավորումներից,

 Պարտավորվել, որ ապագայում նմանատիպ համակարգեր չեն գնի,

 Կատարել մյուս բոլոր իրավական պահանջները։

Թուրքիան դեռևս չի կատարել այս պայմանները: Միևնույն ժամանակ, Վաշինգտոնն ու Անկարան շարունակում են բանակցել այս հարցի շուրջ։ 

Այս դիրքորոշումը հակասում է Դոնալդ Թրամփի՝ ավելի վաղ արած հայտարարություններին։ Այս ամսվա սկզբին Անկարայում ՆԱՏՕ-ի գագաթնաժողովի ժամանակ Ռեջեփ Թայիփ Էրդողանի հետ հանդիպումից հետո Թրամփը հայտարարել էր, թե Թուրքիան կստանա F-35-ները։

Այնուամենայնիվ, ԱՄՆ-ն Թուրքիային համարում է ՆԱՏՕ-ի կարևոր դաշնակից և պատրաստ է համագործակցել տարբեր հարցերով:

 Թուրքիան աջակցում է ԱՄՆ դիվանագիտական ջանքերին՝ Ռուսաստան-Ուկրաինա, Հայաստան-Ադրբեջան և Գազայի հատվածի հակամարտությունների կարգավորման հարցերում, ինչպես նաև մասնակցում է «Իսլամական պետության» դեմ պայքարին։