Թրամփը 11 հոգու ներում է շնորհել

Միացյալ Նահանգների նախագահ Դոնալդ Թրամփը ստորագրել է 11 հոգու ներում շնորհելու մասին հրամանագրեր, որոնց թվում են օդի որակի բարելավմանն ու արտանետումների նվազեցմանն ուղղված «Մաքուր օդի մասին» օրենքը խախտած անձինք:

Ինչպես հաղորդում է CNN հեռուստաալիքը, ԱՄՆ նախագահ Դոնալդ Թրամփը ուրբաթ օրը ստորագրել է հրամանագրեր, որոնցով ներում է շնորհվել 11 անձի, այդ թվում՝ արտանետումների կրճատմանն ու օդի որակի բարելավմանն ուղղված «Մաքուր օդի մասին» (Clean Air Act) օրենքի խախտման գործերում ներգրավվածներին։

Հետագայում Սպիտակ տան պաշտոնյան հստակեցրել է, որ ընդհանուր առմամբ ներման արժանացած 11 անձինք մեղադրվել կամ դատապարտվել էին բնապահպանական կանոնները շրջանցելու տարբեր դրվագներով: ԱՄՆ դատախազության փոխանցմամբ՝ դատապարտվածների մի մասը ներգրավված է եղել բեռնատար մեքենաների արտանետումների վերահսկման համակարգերն անջատելու, ինչպես նաև բնապահպանական ստանդարտները շրջանցելու հնարավորություն տվող սարքերի վաճառքի սխեմաներում:

Սպիտակ տնից հայտնել են, որ ներում շնորհելու որոշումն ընդունվել է խորհրդականների նեղ կազմի, այդ թվում՝ վարչակազմի իրավաբանական խորհրդատուների և ԱՄՆ արդարադատության նախարարության ներկայացուցիչների կողմից գործերի ուսումնասիրությունից հետո, իսկ վերջնական որոշումը կայացրել է երկրի ղեկավարը։