Իրանից նախազգուշացնող հայտարարություն․ սպառնում է առգրավել նավերը

Իրանը մտադիր է սահմանափակումներ կիրառել, տուգանքներ սահմանել և նույնիսկ առգրավել այն նավերը, որոնք խախտել են Իրանի իշխանությունների սահմանած՝ Հորմուզի նեղուցով անցնելու կանոնները։ Այս մասին հայտարարել է Հորմուզի նեղուցում նավագնացության վերահսկողության իրանական վարչությունը։

«Վարչության կողմից սահմանված՝ Հորմուզի նեղուցով անցնելու կանոնները նավերի կողմից խախտելու դեպքում նրանց նկատմամբ կկիրառվեն սահմանափակումներ, այդ թվում՝ տուգանքներ, կալանավորում կամ նավերի առգրավում՝ նեղուցից հետագայում օգտվելու դեպքում»,-  նշվում է հայտարարության մեջ։

Վարչությունից հայտնել են, որ Պարսից ծոց կամ այնտեղից ծովային փոխադրումներ իրականացնող նավատերերը պետք է ծանոթանան խախտողների ցանկին՝ «հնարավոր խնդիրներից խուսափելու համար»։

Նշվում է, որ «այն նավերը, որոնք համագործակցում են խախտողների ցանկում արդեն ընդգրկված այլ նավերի հետ, նույնպես կավելացվեն այդ ցանկում»։ Նավատերերը, որոնք ցանկանում են իրենց անունները հանել ցանկից, «պետք է հատուկ դիմում ներկայացնեն վարչության ստորաբաժանումներից մեկին՝ բացատրելով իրանական կանոնների խախտման պատճառները»։