Թիմ Քուկը հեռանում է Apple-ի գլխավոր տնօրենի պաշտոնից

Apple ընկերության ղեկավար Թիմ Քուկը լքում է իր պաշտոնը, նրան կփոխարինի փոխնախագահ Ջոն Թերնուսը։

Քուկն Apple-ում իր գործունեությունը սկսել է 1998 թվականին։ 2011-ին՝ Սթիվ Ջոբսի հեռանալուց հետո, նա ստանձնեց գլխավոր տնօրենի պաշտոնը՝ ղեկավարելով մի շարք արտադրանքների ու ծառայությունների ներդրումը, այդ թվում՝ Apple Watch-ը, AirPods-ը և Apple Vision Pro-ն, ինչպես նաև iCloud, Apple Pay, Apple TV և Apple Music հարթակները։

Նա նաև վճռորոշ դերակատարում է ունեցել առկա ապրանքատեսակների զարգացման գործում։ Քուկի ղեկավարման տասնամյակի ընթացքում Apple-ի կապիտալիզացիան 350 միլիարդ դոլարից հասել է 4 տրիլիոնի՝ գրանցելով ավելի քան 1000% աճ։ Տարեկան հասույթը նույնպես շեշտակի աճել է՝ 2011 ֆինանսական տարվա 108 միլիարդ դոլարից 2025-ին հասնելով ավելի քան 416 միլիարդ դոլարի։

Թիմ Քուկը կպահպանի գործադիր տնօրենի պաշտոնը և ամռան ընթացքում կշարունակի կատարել գլխավոր տնօրենի պարտականությունները՝ լիազորությունների սահուն փոխանցումն ապահովելու նպատակով։

«Ինձ համար կյանքիս մեծագույն պատիվն էր լինել Apple-ի գլխավոր տնօրենը և լինել նման ակնառու ընկերության վստահված ղեկավարը։ Ես ամբողջ սրտով սիրում եմ Apple-ը և շատ երախտապարտ եմ այսպիսի գյուտարար, նորարար, ստեղծագործ և խորապես հոգատար մարդկանց թիմի հետ աշխատելու հնարավորության համար, ովքեր անդադար ձգտում են հարստացնել մեր հաճախորդների կյանքը և ստեղծել աշխարհի լավագույն ապրանքներն ու ծառայությունները», - ասել է Քուկը։