Իսրայելը նախապատրաստվում է Իրանի դեմ ռազմական գործողությունների վերսկսմանը

Իսրայելի պաշտպանության բանակը նախապատրաստվում է Իրանի դեմ ռազմական գործողությունների վերսկսմանը՝ ԱՄՆ-ի և Իրանի միջև բանակցությունների ձախողման ֆոնին։

Իսրայելական առաջատար լրատվամիջոցների փոխանցմամբ՝ բանակցությունների տապալումը վկայում է հրադադարի հնարավոր փլուզման մասին։ Իսլամաբադում Պակիստանի միջնորդությամբ երկու շաբաթ ընթացող քննարկումները սպասված արդյունքը չեն տվել։ Վաշինգտոնի պնդմամբ՝ Թեհրանը հրաժարվել է պահպանել «կարմիր գծերը», որոնք են՝ Իրանի միջուկային ծրագրի դադարեցումը և ահաբեկչական խմբավորումներին աջակցությունից հրաժարվելը։

Իսրայելական հեռուստաալիքները հայտնում են, որ երկրի ռազմաքաղաքական ղեկավարությունը պատրաստվում է վատթարագույն սցենարին։ Իսրայելի Զինված ուժերի գլխավոր շտաբի պետ, գեներալ-լեյտենանտ Էյալ Զամիրը հրահանգել է զորքերը բերել «ուժեղացված պատրաստվածության վիճակի»։

Ըստ «Կան» պետական հեռուստառադիոընկերության՝ Իսրայելը շահագրգռված է վերսկսել ռազմական ճնշումը, քանի որ նախորդ փուլը համարում է «չափազանց շուտ» ավարտված՝ առանց Իրանի հրթիռային և միջուկային ծրագրերի վրա էական ազդեցության։