Եթե Իրանում հակամարտությունը շարունակվի Հայաստանում գնաճ կլինի. ԿԲ նախագահ

Եթե Իրանում հակամարտությունը շարունակվի, ՀՀ-ում գնաճը 1,2-1,7%-ով կաճի, պատճառը նաև նավթի գինն է: Այս մասին մամլո ասուլիսի ժամանակ ասել է ԿԲ նախագահ Մարտին Գալստյանը:

«Մեր գնահատականներով՝ դա նավթի գնի ավելացումներն են, ներմուծման այլընտրանքային ճանապարհների օգտագործման արդյունքում գնի որոշակի աճը և Իրանից ներմուծվող պարենային ապրանքների  որոշակի փոխառումը, սա ռիսկերի տիրույթում է, մենք չենք ասում, որ սա տեղի է ունենալու, բայց տեղի ունենալու պարագայում 1,2-1,7%-ով գնաճը կաճի:

Տնտեսության վրա ազդեցության մասով մի քանի ուղղի կա, ուղղիներից առաջինը դա կոնֆլիկտի ազդեցությունն է համաշխարհային տնտեսության և ընդհանուր տնտեսական զարգացումների: Հակամարտությունը ավելացնում է գնաճի ավելացման տեսանկյունից, ինչը բավականին անցանկալի երևույթ է լինելու մեզ համար: Ուստի մեր քննարկումների ընթացքում այդ կոմպոնենտին մեծ կշիռ ենք տվել: Երկրորդը՝ եթե արտաքին պահանջարկը նվազեց, դա ազդելու է մեր տնտեսության արդյունքների վրա»,- նշել է նա:

Պոտենցիալ ռիսկերի տեսանկյունից՝ Մարտին Գալստյանը հավելել է, որ խնդիրներից է Միջին Արևելքի շուկաներում հայկական ընկերությունների կողմից ապրանքների իրացման հնարավորության սամանափակումները: