Ի վերջո, Հայաստանի պետական պարտքը շա՞տ է, թե՞ քիչ. Պապոյանը՝ արտաքին պարտքի մասին

Հայաստանի էկոնոմիկայի նախարար Գևորգ Պապոյանն անդրադարձել է Հայաստանի պետական պարտքի շուրջ քննարկումներին։

՝Պապոյանը թեմային անդրադարձել է «Ֆեյսբուք»-ի իր էջում հրապարակած տեսանյութում։

«Պարտք, պարտք, պարտք․․․ մի բան, որի մասին Հայաստանում վերջերս շատ են խոսում։ Ի վերջո, Հայաստանի պետական պարտքը շա՞տ է, թե՞ քիչ, ավելացե՞լ է, թե՞ պակասել է։ Հայաստանի պետական պարտքը 2017 թվականին կազմում էր մեր ՀՆԱ-ի 59 տոկոսը, այնինչ 2025 թվականին կազմում է մեր ՀՆԱ-ի 49 տոկոսը։

Այսինքն՝ մեր պետական պարտքի բեռը նվազել է, իսկ դա նշանակում է, որ պետական պարտքը մեր երկրում, չնայած բացարձակ թվերով ավելացել է, բայց դրա սպասարկումը հեշտացել է, և դա՝ որպես բեռ, մեր պետության և հայ ժողովրդի համար փոքրացել է։ Մի օրինակ բերեմ․ պատկերացնենք երկու ընտանիք։ Մեկն ունի ամսական ընդամենը 200 հազար դրամ եկամուտ, բայց վարկ չունի, պարտք չունի, իսկ մյուսն ունի 100 միլիոն դոլար և ունի 20 միլիոն դոլարի վարկ։

Ո՞ր ընտանիքն է լավ ապրում, իհարկե, երկրորդը։ Հետևաբար, պարտքի բացարձակ ծավալը կարևոր չէ, կարևոր է, թե այն ինչ հատված է զբաղեցնում քո եկամուտների մեջ, իսկ Հայաստանի եկամուտների մեջ մեր պարտքի ծավալը նվազել է»․- ասել է ՀՀ էկոնոմիկայի նախարարը։