ՌԴ ԱԳՆ աշխատակցին 12 տարի ազատազրկել են՝ ԱՄՆ հետախուզության հետ համագործակցության համար
Մոսկվայի քաղաքային դատարանը Ռուսաստանի ԱԳՆ նախկին աշխատակից Արսենի Կոնովալովին 12 տարվա ազատազրկման է դատապարտել՝ ամերիկյան հետախուզության հետ կապի համար։ Այս մասին հայտնում է «Ինտերֆաքսը»։
«Մոսկվայի քաղաքային դատարանը մեղադրական դատավճիռ է կայացրել Ռուսաստանի Դաշնության քաղաքացի, 1987թ. ծնված Արսենի Սերգեևիչ Կոնովալովի նկատմամբ, ով ձերբակալվել էր Ռուսաստանի ԱԴԾ աշխատակիցների կողմից 2024 թվականի մարտին՝ օտարերկրյա հատուկ ծառայությունների հետ համագործակցության համար»,- գրում է լրատվականը։
Նրան նաև նշանակվել է 100 հազար ռուբլի տուգանք և ազատության սահմանափակում՝ մեկ տարի ժամկետով։
«Անվտանգության մարմինների իրականացրած օպերատիվ-հետախուզական միջոցառումների արդյունքում պարզվել է, որ Կոնովալովը, լինելով Ռուսաստանի ԱԳՆ աշխատակից, ԱՄՆ տարածքում երկարաժամկետ արտասահմանյան գործուղման ընթացքում, դրամական վարձատրության դիմաց սեփական նախաձեռնությամբ ամերիկյան հետախուզությանն է փոխանցել ծառայության բերումով իրեն հայտնի դարձած գաղտնի տեղեկությունները», - հայտարարել են հատուկ ծառայությունից։
ԱԴԾ քննչական վարչության կողմից հարուցվել և քննվել է քրեական գործ՝ Ռուսաստանի Քրեական օրենսգրքի 275-րդ հոդվածով (պետական դավաճանություն) նախատեսված հանցագործության հատկանիշներով։
