Գլխավոր դատախազությունն ուսումնասիրում է Գյումրիի քաղաքապետ Վարդան Ղուկասյանի հայտարարությունը

Գլխավոր դատախազությունն ուսումնասիրում է Գյումրիի քաղաքապետ Վարդան Ղուկասյանի հայտարարությունը։ Այս մասին 24News-ին հայտնել են ՀՀ գլխավոր դատախազությունից։

Հիշեցնենք, որ հոկտեմբերի 2-ին Գյումրիի քաղաքապետ Վարդան Ղուկասյանը մամուլի ասուլիսի ժամանակ հայտարարել էր, թե Քաղաքացիական պայմանագիր կուսակցությունն ընտրակաշառք էր բաժանել։

Գյումրիի քաղաքապետը, մասնավորապես, ասել էր․ «Ասում եք ընտրակաշառք, ո՞վ չգիտի, որ դուք եք բաժանել ընտրակաշառքը, լրագրողներդ, բոլորդ տեսել եք, որ «գծի հետևում» ու մնացած տեղերը խանութներ կան, որ մի մարդուն 60 հազար դրամ փող եք տվել։ Ամբողջ քաղաքը խոսում է ձեր ընտրակաշառք բաժանելուց, ամբողջ հանրապետության ՔՊ-ներին բերել, լցրել էիք էստեղ։ Ես փաստ ունեմ, որ մի տան վրա 57 հոգի մարդ են գրանցել, էդ մարդիկ եկել են ընդունելության, ինձ ասում են՝ պարոն Ղուկասյան, 57 հոգի են գրանցել, սրանք ովքեր են»։