Երեխան մոլորվել է, փորձել՝ գտնել հարազատներին․ ՆԳՆ-ը՝ հանգստյան գոտուց կորած երեխայի դեպքի մասին

ՆԳՆ մամուլի խոսնակ Նարեկ Սարգսյանը ֆեյքբուքյան էջում որոշ մանրամասներ է հայտնել Գետազատ գյուղի հանգստյան գոտում երեխայի կորելու դեպքի առնչությամբ։

«Արարատի մարզի Գետազատ գյուղի հանգստյան գոտում երեխան խաղալիս մոլորվել է, փորձելով գտնել հարազատներին՝ քայլել է հակառակ ուղղությամբ ու այդպես հայտնվել Լանջազատ գյուղում»։

Ավելի վաղ հայտնել էինք, որ Գետազատ գյուղի հանգստի գոտում 13։20-ի սահմաններում 4 տարեկան աղջիկ է կորել։

Սարգսյանի խոսքով` լայնածավալ որոնողափրկարարական աշխատանքներ են իրականացվել տարածքում, այդ թվում՝ մոտակա ջրանցքում։ 

«Ժամը 18։40-ի սահմաններում՝ավելի քան 4 ժամ որոնումներից հետո, 4-ամյա երեխան հայտնաբերվել է Արարատի մարզի Լանջազատ բնակավայրում՝ գետի ափին։ Փոքրիկի մարմնի վրա վնասվածքներ են եղել։ Առկա քերծվածքները նա ստացել է երկար քայլելու և ճանապարհին ճյուղերին հպվելու հետևանքով։ Երեխան տեղափոխվել է բժշկական կենտրոն»,- հայտնել է Սարգսյանը։

Նա ընդգծել է, որ երեխայի կյանքին վտանգ չի սպառնում։