Ռմբակոծվել է Թել Ավիվի Բեն Գուրիոն օդանավակայանը. հասանք մեր նպատակին. «Անսար Ալլահ»
Եմենի ապստամբական «Անսար Ալլահ» շարժման հուսիթները բալիստիկ հրթիռով հարձակվել են Թել Ավիվի Բեն Գուրիոն օդանավակայանի վրա: Այս մասին հայտնել է ապստամբ զինված ուժերի խոսնակ Յահյա Սարիան, հաղորդում է «Ալ Մասիրա» հեռուստաալիքը։
Նրա խոսքով՝ հրթիռային ուժերը ռազմական գործողություն են իրականացրել՝ Բեն Գուրիոնի վրա հարձակվելով «Զուլֆիկար» տիպի բալիստիկ հրթիռի միջոցով։
Նա նաև նշել է, որ գործողությունը «հաջողությամբ հասել է իր նպատակին» և հարձակման հետևանքով օդանավակայանի գործունեությունը կասեցվել է։
Հիշեցնենք՝ Հունիսի 1-ին հուսիթները հայտնեցին Բեն Գուրիոնի և Իսրայելում գտնվող երեք այլ թիրախների վրա հարվածների մասին: Ավելի վաղ Իսրայելի պաշտպանության ուժերը (IDF) հայտնեցին Եմենից Իսրայելի տարածքի ուղղությամբ հրթիռի արձակման մասին՝ նշելով, որ հակաօդային պաշտպանության համակարգերը աշխատում են այն որսալու ուղղությամբ:
Հավելենք՝ հուսիթները հայտարարել էին Իսրայելի Հայֆա նավահանգստի շրջափակում սահմանելու մտադրության մասին։
