Արատավոր պրակտիկա․ Զախարովան՝ ՀՀ իշխանություններին

ՌԴ-ն քաղաքագետ Միհրանյանի մուտքը Հայաստան արգելելը համարում է Երևանի ոչ բարեկամական քայլ: Այս մասին ճեպազրույցի ժամանակ հայտարարել է ՌԴ ԱԳՆ պաշտոնական ներկայացուցիչ Մարիա Զախարովան։

«Մենք Անդրանիկ Միհրանյանի մուտքի արգելքը դիտարկում ենք որպես բացարձակ ոչ բարեկամական քայլ։ Դա հակասում է մեր երկկողմ հարաբերությունների դաշնակցային կարգավիճակին»,- ընդգծել Է Զախարովան։

Նրա խոսքով՝ Ռուսաստանի ԱԳՆ-ն պաշտոնական հարցում է ուղարկել հայկական իշխանություններին՝ պարզաբանումների պահանջով։ Նա նաեւ նշել է, որ ռուսական կողմը բազմիցս կոչ է արել Երեւանին հրաժարվել ՌԴ քաղաքացիների մուտքը երկիր թույլ չտալու «արատավոր պրակտիկայից», որոնք ինչ-ինչ պատճառներով անհարմար են եղել իշխանություններին:

«Դա հատկապես տարօրինակ է թվում Հայաստանի իշխանությունների՝ դրանց բաց լինելու, ժողովրդավարության և կարծիքների բազմակարծությանը հավատարիմ մնալու մասին մշտական հայտարարությունների ֆոնին»,- հավելել Է Զախարովան:

Զախարովայի խոսքով՝ Մոսկվան մտադիր է շարունակել այդ հարցը բարձրացնել Երևանին: