ՏԵՍԱՆՅՈՒԹ․ Փաշինյանի պատասխանը Պուտինին

ՀՀ վարչապետ Նիկոլ Փաշինյանը Բիշքեկում ՌԴ նախագահ Վլադիմիր Պուտինի հետ ընթացող հանդիպման ժամանակ անդրադարձել է ԵՄ-ին անդամակցելու գործընթացին և ԵԱՏՄ-ում Հայաստանի հետագա անդամակցության հարցին։

Փաշինյանը հայտարարել է, որ հայկական կողմն ուսումնասիրել է իրավական բազան և որևէ խախտում չի արձանագրել ո՛չ Ռուսաստանի, ո՛չ էլ ԵԱՏՄ-ի նկատմամբ։

«Մենք ուսումնասիրել ենք իրավական բազան և որևէ խախտում չենք հայտնաբերել ոչ ՌԴ-ի նկատմամբ, ոչ ԵԱՏՄ-ի։ Վերջինիս կանոնադրությունը հստակ սահմանում է, թե ինչ պետք է անի երկիրը միությունից դուրս գալու համար։ Իսկ մենք չենք հայտարարել ԵԱՏՄ-ից դուրս գալու մասին»,- ասել է Փաշինյանը՝ խոսելով ԵՄ-ին անդամակցելու գործընթացի մասին։

Վարչապետն անդրադարձել է նաև ԵՄ-ին անդամակցության գործընթացի մեկնարկի մասին օրենքի ընդունմանը։

Նրա խոսքով՝ եթե Ազգային ժողովը չընդուներ օրենքը, քաղաքացիական հասարակությունը կհավաքեր անհրաժեշտ 350 հազար ստորագրությունը, և օրենքը կրկին չընդունելու դեպքում Հայաստանը ստիպված կլիներ հանրաքվե անցկացնել։

«Փաստացի այդ օրենքի ընդունմամբ մենք հրաժարվել ենք հանրաքվեի գաղափարից։ Իսկ հրաժարվել ենք, որովհետև այդ հարցը դեռ հասունացած չէ»,- Պուտինին ասել է Փաշինյանը։

ՀՀ վարչապետը նաև հայտարարել է, որ Հայաստանը հետաքրքրված է Ռուսաստանի հետ հարաբերությունների հետագա զարգացմամբ։

«Կոնֆլիկտի շրջանում Հայաստանի և Ռուսաստանի հարաբերություններն այլ իմաստ ունեին։ Այժմ, երբ տարածաշրջանում խաղաղություն է հաստատված, մենք կարծում ենք, որ պետք է իրավիճակին թարմ հայացքով նայել»,- նշել է նա։

Հիշեցնենք՝ այս պահին Բիշքեկում ընթանում է Նիկոլ Փաշինյանի և Վլադիմիր Պուտինի հանդիպումը։

Ավելի վաղ հանդիպման ընթացքում ՌԴ նախագահը հայտարարել էր, որ ԵՄ-ին անդամակցելու Հայաստանի ձգտումը երկրի օրինական իրավունքն է, սակայն այն դժվարություններ է ստեղծում՝ հաշվի առնելով ԵԱՏՄ-ին Հայաստանի անդամակցությունը։

Պուտինը նաև նշել էր, որ մեկ այլ կազմակերպությանն անդամակցելու գործընթաց սկսելու մասին օրենքի ընդունումը նշանակում է գործող միությունից դուրս գալու մասին հայտարարություն։ Նա Երևանին կոչ էր արել հնարավորինս արագ կողմնորոշվել ԵՄ-ին անդամակցելու հարցում՝ նշելով, որ Մոսկվան պետք է հասկանա, թե ինչպես է կառուցելու Հայաստանի հետ հետագա հարաբերությունները։