Բայդենը՝ ՄՔԴ-ի կողմից Նեթանյահուի ձերբակալության օրդերի տրամադրման մասին

ԱՄՆ նախագահ Ջո Բայդենը վրդովեցուցիչ է համարում Միջազգային քրեական դատարանի կողմից Իսրայելի վարչապետ Բենիամին Նեթանյահուի և հրեական պետության պաշտպանության նախկին նախարար Յոավ Գալանտի նկատմամբ ձերբակալման օրդերը: Այս մասին ասված է Սպիտակ տան մամուլի ծառայության տարածած հայտարարության մեջ։

«ՄՔԴ-ի կողմից Իսրայելի ղեկավարության ձերբակալման օրդեր տրամադրելը վրդովեցուցիչ է։ Թույլ տվեք ևս մեկ անգամ պարզաբանել. անկախ նրանից, թե ինչ կարող է ակնարկել ՄՔԴ-ն, Իսրայելի և ՀԱՄԱՍ շարժման միջև հավասարության նշան չկա։ Մենք միշտ կանգնելու ենք Իսրայելի կողքին՝ նրա անվտանգության սպառնալիքների դեպքում», - ասվում է հայտարարության մեջ։

Հիշեցնենք՝ ավելի վաղ հայտնել էինք, որ ՄՔԴ-ի դատախազ Քարիմ Խանը ՄՔԴ-ին պահանջել է Իսրայելի վարչապետ Բենիամին Նեթանյահուին, Իսրայելի պաշտպանության նախարարին, ինչպես նաև պաղեստինյան ՀԱՄԱՍ խմբավորման երեք առաջնորդներին ձերբակալելու օրդեր տալ: