ՄՔԴ-ն Նեթանյահուին և Գալանտին ձերբակալելու հրաման է տվել

Միջազգային քրեական դատարանի դատախազ Քարիմ Խանը ՄՔԴ-ին պահանջել է Իսրայելի վարչապետ Բենիամին Նեթանյահուին, Իսրայելի պաշտպանության նախարարին, ինչպես նաև պաղեստինյան ՀԱՄԱՍ խմբավորման երեք առաջնորդներին ձերբակալելու օրդեր տալ:

Խանը կարծում է, որ նրանք բոլորը մեղավոր են Իսրայելի վրա ՀԱՄԱՍ-ի հարձակման և Գազայի հատվածում իսրայելական ուժերի պատասխան գործողության ընթացքում կատարված ռազմական հանցագործությունների համար:

ՄՔԴ-ի կայքում հրապարակված պաշտոնական հաղորդագրության մեջ Խանը գրում է, որ Գազայում ՀԱՄԱՍ-ի առաջնորդ Յահյա Սանվարը, խմբավորման քաղաքական թևի առաջնորդ Իսմայիլ Հանիան, ինչպես նաև նրա զինվորական ստորաբաժանումների առաջնորդ Մուհամեդ Դիաբ ալ Մասրին մեղավոր են մարդկության դեմ հանցագործությունների, ինչպես նաև ռազմական հանցագործությունների համար:

Հայտարարության մեջ Նեթանյահուին և Իսրայելի պաշտպանության նախարար Յոավ Գալանտին մեղավոր են ճանաչել` սովը, որպես պատերազմ վարելու միջոց օգտագործելու, խաղաղ բնակիչների սպանության և այլ ռազմական հանցագործությունների համար:

Այժմ ՄՔԴ դատավորները պետք է որոշեն, թե արդյոք բավարար հիմքեր կան ձերբակալման օրդեր տալու համար:

Առայժմ հայտնի չէ, թե որքան ժամանակ կպահանջվի դատարանին գործը քննելու համար: Ինչպես պարզաբանում են BBC-ի թղթակիցները, երբեմն դատախազական հարցման ի հայտ գալու պահից մինչև կալանավորման մասին որոշման կայացումը մի քանի շաբաթ կամ նույնիսկ ամիս է անցնում: