ԻՀՊԿ սպաները լքում են Սիրիայի տարածքը` Իսրայելի հնարավոր հարվածի ֆոնին. WSJ
Իսրայելի կողմից հարված հասցնելու սպառնալիքի պատճառով Իրանի Իսլամական հեղափոխության պահապանների կորպուսի (ԻՀՊԿ) հրամանատարությունը սպաների մի մասին դուրս է բերել Սիրիայից։ Այս մասին, հղում անելով սեփական աղբյուրներին, հայտնում է «The Wall Street Journal» թերթը;
Նրա տվյալներով ՝ Սիրիայում կմնան միջին օղակի սպաները, բայց նրանք, անվտանգության նկատառումներից ելնելով, կտեղափոխվեն:
«Թեհրանը նաև սկսել է անձնակազմին դուրս բերել Սիրիայի այն օբյեկտներից, որտեղ մեծ ներկայություն ունի Իսլամական հեղափոխության պահապանների կորպուսը», - պարբերականին հայտնել են սիրիացի և իրանցի պաշտոնյաներն ու խորհրդականները:
Սիրիայի անվտանգության ծառայության ներկայացուցիչները «Wall Street Journal»-ին հայտնել են, որ ԻՀՊԿ-ն և լիբանանյան «Հզբոլլահ» խմբավորումը կրճատել են իրենց բարձրաստիճան սպաների ներկայությունը Սիրիայում:
Պարբերականը նշում է, որ Սիրիայում իրանական օբյեկտների վրա հարձակումը Իսրայելին թույլ կտա «վրեժխնդրության հարված» հասցնել` միաժամանակ խուսափելով տարածաշրջանում լայնամասշտաբ պատերազմից։
Թերքին արաբ պաշտոնյաները հայտնել են, որ Իսրայելը նախքան Իրանի դեմ պատասխան քայլեր ձեռնարկելը հավանաբար կզգուշացնի արաբական երկրների իր տարածաշրջանային դաշնակիցներին:
