«Ձեզ նման՝ մենք էլ ենք այդ խնդրից բողոքում». Գնել Սանոսյան
«Ձեզ նման՝ մենք էլ ենք այդ խնդրից բողոքում»,- հայտարարել է ՏԿԵՆ նախարար Գնել Սանոսյանը՝ արձագանքելով ԱԺ ՔՊ խմբակցության պատգամավոր Արսեն Թորոսյանի հարցին։
Պատգամավորը նշել էր, թե ջրագծերի, մալուխների կամ գազատարների անցկացումից հետո, երբ կրկին ասֆալտում են, ճանապարհների որակը անհամեմատ վատանում է. «Անհիշելի ժամանակներից գրեթե չեմ տեսել նման աշխատանքներից հետո օրիգինալ տեսքի բերված ճանապարհներ»։
Գնել Սանոսյանը նշեց, որ ճանապարհներն իրենց տիրապետման ներքո են, և «Գազպրոմի», «Վիոլա ջրի» կամ ՀԷՑ-ի կողմից աշխատանքները հաճախ արվում են առանց համաձայնեցնելու․ «Հաճախ դրանք վերականգնվում են ոչ այնպես, ինչպես պետք է վերականգնվեն, և մենք ու այդ կառույցները սկսում ենք իրար հետ խնդիր ունենալ։ Ձեր բարձրաձայնած հարցը ոչ միայն տեղին է, այլ նաև մենք այդ խնդրին բախվում ենք, բարձրաձայնում ենք»։
