Իշխանական վերնախավում քննարկվում է Էկոնոմիկայի նոր նախարարի թեկնածությունը։ Այս մասին հայտնում է Irakanum.am–ը:

Լրատվամիջոցը, վկայակոչելով իր հավաստի տեղեկությունները, նշում է, որ այդ պաշտոնին հնարավոր է նշանակվի ԱԺ պատգամավոր, ՔՊ վարչության փոխնախագահ Գևորգ Պապոյանը։

«Մենք փորձեցինք տեղեկությունը ճշտել Պապոյանից, սակայն վերջինս մեր հեռախոսազանգերին չպատասխանեց»,– գրել է կայքը:

Ինչպես արդեն հայտնել էինք, Էկոնոմիկայի նախարար Վահան Քերոբյանը հրաժարական է ներկայացրել զբաղեցրած պաշտոնից։ 

«Հայաստանի Հանրապետության սիրելի՛ բնակիչներ։

Ստացվեց այնպես, որ ես էկոնոմիկայի նախարարի պաշտոնում այլևս չեմ ծառայելու Ձեզ։ Այս 3-ից ավելի տարվա ընթացքում աշխատել եմ անմնացորդ նվիրվածությամբ, լցված սիրով Հայաստանի յուրաքանչյուր բնակչի նկատմամբ։ Աշխատել եմ շաբաթական առնվազն վեց օր, միջինում առավոտյան 8-ից՝ երեկոյան 9-ը, երեք տարվա ընթացքում՝ ընդհանուր առմամբ, 15-16 օգտագործված արձակուրդային օրերով։ Իմ աշխատանքի յուրաքանչյուր օրն ապրել եմ օր առաջ հզոր Հայաստան ունենալու գերիշխող մղումով։ Եղել եմ վճռական, ազնիվ ու նվիրված հայրենիքին»,– գրել էր Քերոբյանը։