Միշուստին. ԵԱՏՄ-ում մարքեթփլեյսների համար կգործեն առևտրի միասնական կանոններ

Ռուսաստանի կառավարության նախագահ Միխայիլ Միշուստինը Եվրասիական միջկառավարական խորհրդի նիստում հայտնել է, որ Եվրասիական տնտեսական միությունում (ԵԱՏՄ) ապրանքների էլեկտրոնային առևտրի վերաբերյալ համաձայնագրի մասին ընդունվող որոշումը կգործարկի մարքեթփլեյսների աշխատանքի միասնական կանոններ։

«Կհաստատենք միության ներքին շուկայում ապրանքների էլեկտրոնային առևտրի մասին համաձայնագիրը», — հայտնել է Միշուստինը։

Նա պարզաբանել է, որ փաստաթուղթը կպաշտպանի վաճառողների և գնորդների իրավունքները։ «Բիզնեսի համար կգործեն միասնական և հստակ կանոններ, իսկ քաղաքացիների համար մարքեթփլեյսներում հասանելի կլինի ապրանքների ավելի լայն տեսականի»։

Միշուստինը նաև հիշատակել է գիտական կոչումների մասին փաստաթղթերի փոխադարձ ճանաչման վերաբերյալ պայմանագիրը։ Այն կօգնի ԵԱՏՄ գիտաշխատողներին ստանալ ավելի շատ հնարավորություններ իրենց ներուժը իրացնելու համար՝ խուսափելով դիպլոմի ճանաչման ընթացակարգից։