Իսրայելը չի ​​դադարեցնի շիայական «Հեզբոլլահ» կազմակերպության թիրախներին հարվածներ հասցնել Լիբանանում, նույնիսկ եթե Գազայի հատվածում ժամանակավոր զինադադարի մասին նոր համաձայնություն ձեռք բերվի։ Այս մասին հայտարարել է հրեական պետության պաշտպանության նախարար Յոավ Գալանտը, գրում է ТАСС–ը:

«Եթե «Հեզբոլլահը» կարծում է, որ երբ հարավում զինադադար լինի, այն կդադարեցնի կրակը (լիբանանա-իսրայելական սահմանին), և մենք կանգ կառնենք, նա մեծ սխալ է թույլ տալիս», - ասել է նախարարը: Նրա խոսքերը մեջբերում է The Times of Israel թերթը։

Գալանտը նշել է, որ իսրայելցի զինվորականները չեն դադարեցնի գործունեությունը, քանի դեռ չի վերականգնվել անվտանգությունը հյուսիսային սահմանում։ «Ես սա ուղղակիորեն կասեմ՝ քանի դեռ չենք հասել մի իրավիճակի, որում հնարավոր լինի վերականգնել անվտանգությունը հյուսիսի բնակիչների համար, մենք կանգ չենք առնելու։ Երբ դրան հասնենք համաձայնագրի կամ ռազմական ճանապարհով, կարող ենք հանգստանալ»,- հավելել է նա: