ՀԱՄԱՍ ահաբեկչական շարժման քաղբյուրոյի ղեկավար Իսմայիլ Հանիեն կոչ է արել լիովին դադարեցնել ռազմական գործողությունները Գազայի հատվածում և իսրայելական զորքերը դուրս բերել անկլավի տարածքից, հայտնում է EFE-ն՝ խմբավորման Telegram ալիքին հղումով։

«Մենք հաստատում ենք մեր դիրքորոշումը՝ ցանկացած բանակցություն պետք է հանգեցնի ագրեսիայի ամբողջական դադարեցմանը, օկուպացիոն բանակի դուրսբերմանը Գազայի հատվածից և տեղահանվածների վերադարձին իրենց բնակության վայրեր», - ասել է նա։

Հանիեն նաև ընդգծել է Գազայի հատվածը վերակառուցելու և իսրայելական բանտերում պաղեստինցի բանտարկյալների հետ պատանդների փոխանակման «լուրջ» համաձայնագրի կնքման անհրաժեշտությունը:

Նրա խոսքով՝ «Իսլամական ջիհադ» խմբավորումը, որը նույնպես պատանդ է պահում իսրայելցիներին, հավատարիմ է նույն սկզբունքներին։

Ավելի վաղ ՀԱՄԱՍ-ի բարձրաստիճան պաշտոնյա Ուսամա Համդանը հայտարարել էր, որ պաղեստինյան խմբավորման ղեկավարությունը շարունակում է Գազայի հատվածում հրադադարի մասին համաձայնագրի քննարկումը։ Նա հավելել է, որ ՀԱՄԱՍ-ը հույս ունի ազատ արձակել հազարավոր պաղեստինցիների, այդ թվում՝ ցմահ ազատազրկման դատապարտվածների, մասնավորապես, նշել է երկու անուն՝ Մարվան Բարղութի և Ահմադ Սաադաթ։