Ֆրանսիացի ֆերմերները նախապատրաստվում են Փարիզի «պաշարմանը»
Ֆրանսիացի ֆերմերներն այսօր տեղական ժամանակով ժամը 14:00-ից (Երևանի ժամանակով 17:00-ից) նախատեսում են սկսել տրակտորներով Փարիզի «պաշարումը»: Այս մասին հայտնում են տեղի լրատվամիջոցները։
Արհմիությունները կոչ են անում փակել մայրաքաղաքի մուտքի գլխավոր մայրուղիները՝ ընդհանուր ութ կետ։ Նպատակն է Փարիզին որևէ ապրանքի մատակարարում թույլ չտալ։
Նախատեսվում է, որ ակցիան կտևի առնվազն հինգ օր: Օբյեկտների թվում, որոնց մուտքը կարող է արգելափակվել, կա երկու առանցքային օդանավակայան՝ Շառլ դը Գոլը և Օրլին, ինչպես նաև Ռունժիի ամենամեծ գյուղատնտեսական շուկան:
Նշենք, որ միաժամանակ Ֆրանսիայի ՆԳՆ-ն ուժեղացրել է անվտանգության միջոցները և կարգուկանոն պահպանելու համար ներգրավել 15 հազար ոստիկանի։
