ԲՏԱ նախարարը՝ ռուսական հեռուստաալիքների փակման մասին
Ռուսական հեռուստաալիքների փակման հարց հիմա չի քննարկվում։ Այս մասին կառավարության նիստից հետո լրագրողների հետ ճեպազրույցում հայտնել է ԲՏԱ նախարար Ռոբերտ Խաչատրյանը։
Նրա խոսքով՝ պետք է հանդիպեն ռուսական կողմի հետ և կոնսուլտացիաներ անցկացնեն՝ արձանագրված խախտումների վերաբերյալ։ Ըստ նախարարի՝ հանդիպման ժամկետը հստակեցված չէ։
«Խախտումները բոլորն արձանագրված են, այստեղ տեղում, որ հանդիպենք, ավելի առարկայական կխոսենք։ Փակման հարց դեռ չի քննարկվում, ամեն ինչ կախված է կոնսուլտացիաների ավարտից։ Հանդիպումը տեղի կունենա Երևանում, այն նախաձեռնել է հայկական կողմը»,-նշեց նախարարը։
