Գազայի քաղաքացիական բնակչության նկատմամբ իսրայելական ռեժիմի հանցագործությունները կանխելու համար լուրջ միջոցներ ձեռնարկելու անհրաժեշտություն կա: ՌԻԱ Նովոստիի փոխանցմամբ` այս մասին ասել է Իրանի զինված ուժերի գլխավոր շտաբի պետ Մոհամմադ Բաղերին Թուրքիայի ազգային պաշտպանության նախարար Յաշար Գյուլերի հետ հեռախոսազրույցում։

«Անհրաժեշտ է լուրջ միջոցներ ձեռնարկել Իսրայելի ռեժիմի հանցագործությունների՝ Գազայի հատվածում խաղաղ բնակիչների վրա դաժան հարձակումները կանխելու և բնակիչներին մարդասիրական օգնություն տրամադրելու համար», – ասել է Բաղերին:

Իրանի զինված ուժերի գլխավոր շտաբի պետն ընդգծել է, որ Ամերիկայի Միացյալ Նահանգների կողմից լայնածավալ աջակցությունը, այդ թվում՝ իսրայելական ռեժիմին զենք և ծանր զինամթերք տրամադրելը, կբարդացնի իրավիճակը։ ԱՄՆ-ի այդ քայլերը նա անվանել է մեղսակցություն իսրայելական ռեժիմի հանցագործություններին։

Հիշեցնենք` հոկտեմբերի 7-ի առավոտյան Իսրայելը Գազայի հատվածից աննախադեպ հրթիռային հարձակման ենթարկվեց։ Իսրայելի բանակի մամուլի ծառայությունից հայտնեցին, որ ծայրահեղականներն ավելի քան 3 հազար հրթիռ են արձակել: Բացի այդ, տասնյակ ահաբեկիչներ ներխուժել են Իսրայելի հարավում գտնվող սահմանամերձ շրջաններ։ Պաղեստինյան ՀԱՄԱՍ շարժման ռազմական թևը հայտարարեց, որ Իսրայելի դեմ «Ալ Աքսայի ջրհեղեղ» գործողություն է անցկացնում: Իսրայելի պաշտպանության բանակն էլ (ՑԱԽԱԼ) հայտնեց Գազայի հատվածում ՀԱՄԱՍ-ի դեմ «Երկաթե թրեր» գործողության մեկնարկի մասին:

Վերջին տվյալներով` Գազայի հատվածում զոհերի թիվը գերազանցել է 3400-ը, իսկ Իսրայելի զոհված բնակիչներինը` հազարը։