Արարատյան դաշտում և Աշտարակում մեղուների 60-70%-ը սատկել է․ որն է պատճառը
Արարատյան դաշտում և Աշտարակ քաղաքի շրջակայքում մեղվաընտանիքների 60-70%-ը սատկել է, քանի որ մեղվաբույծները զգուշացված չեն եղել թունաքիմիկատներով դաշտերի ցողման մասին: Տեղեկությունը Sputnik Արմենիային հայտնել է «Հայաստանի մեղվաբույծների ազգային միավորում» հասարակական կազմակերպության փոխնախագահ Արմեն Նազարյանը։
Նրա խոսքով ՝ պետականորեն որևէ զգուշացում չի եղել մեղվաբույծներին գյուղատնտեսական վնասատուների դեմ պայքարի աշխատանքների մեկնարկի մասին, որպեսզի որևէ միջոցառում իրականացնեն։
«Ամեն մեկն իր ծանոթին է զգուշացրել, բայց մասսայական զգուշացում չի եղել։ Ծանոթներին ասել են, ով իմացել է, տարել է, ով էլ չի իմացել կամ չի հասցրել տանել, նրա մեղուները կոտորվել են։ Այս տարի հատկապես ահազանգերը շատ են եղել, որ մեղուները թունավորվել են, բայց որևէ բան հնարավոր չէր անել»,–ասել է Նազարյանը։
Մեղվաբույծը նշել է, որ մեղուների անկման դեպքերը տեղի են ունենում բավականին հաճախ, հատկապես գարնանային սրսկման սեզոնին:
Ինչ վերաբերում է մեղվաբուծության ոլորտի խնդիրներին, Նազարյանը նշել է, որ ամենալուրջ հարցերից մեկը մեղրի որակի հավաստագրումն է։
«Խոսքը էկո-սերտիֆիկացման մասին է, որի համար լուրջ գումարներ են պահանջվում։ Բայց մեղվաբույծը, այդքան գումար ծախսելով, չի կարողանա արդյունք ստանալ, հատկապես փոքր տնտեսություններում», - ասել է փորձագետը։
Մանրամասները՝ կայքում։
