Փաշինյանը ցանկանում էր իր «սրտի կաթողիկոսին» նշանակել և սկսել է արշավ եկեղեցու դեմ. Գառնիկ Դանիելյան

Ազգային ժողովի «Հայաստան» դաշինքի պատգամավոր Գառնիկ Դանիելյանը խորհրդարանական ճեպազրույցի ժամանակ հայտարարել է, որ իշխանությունները նպատակ են հետապնդում միջամտել Հայ Առաքելական Սուրբ եկեղեցու գործերին և վերահսկել հոգևոր կառույցները։

«Ամիսներ առաջ ասել էի, որ Կենտրոնական ընտրական հանձնաժողովում, ֆեդերացիաներում և տարբեր կառույցներում իրենց սրտի մարդկանց նշանակելուց հետո հաջորդը լինելու է եկեղեցին։ Նիկոլ Փաշինյանը շատ մեծ ցանկություն ուներ իր սրտի կաթողիկոսին նշանակելու»,– նշել է պատգամավորը։

Դանիելյանի խոսքով՝ իշխանությունների նպատակը այն կառույցների նկատմամբ վերահսկողություն հաստատելն է, որոնք պարբերաբար գնահատականներ էին տալիս նրանց գործողություններին։ «Ասում են՝ եկեղեցին չուլանացրել են և այլն, այսինքն՝ հստակ ուղղորդում է եղել իշխանությունների կողմից»,– հավելել է նա։

Պատգամավորը նաև հիշեցրել է, որ նախկինում վարչապետն ինքն էր հայտարարել, թե պետությունը չպետք է խառնվի եկեղեցու գործերին։ «Ի՞նչ եղավ, որ սկսեց խառնվել եկեղեցու գործերին և ոչ միայն խառնվել, այլ գնաց ավելիին՝ եկեղեցին պառակտելու, առանձին աղանդ դարձնելու ուղղությամբ»,– եզրափակել է Դանիելյանը։