Կադաստրի կոմիտեի ղեկավարն անդրադարձել է Հովհաննավանքի սեփականության կարգավիճակին

Կադաստրի կոմիտեի ղեկավար Սուրեն Թովմասյանը լրագրողների հետ զրույցում անդրադարձել է իր մասնակցությանը Հովհաննավանքում կիրակի օրը անցկացված պատարագին, որը մատուցել էր կարգալույծ եղած տեր Արամը։ Թովմասյանը շնորհակալություն է հայտնել վերջինիս՝ մատուցած ծառայության համար։

«Գոյություն ունեն կարգեր և կանոններ, որոնց բոլորս պետք է հետևենք՝ անկախ պաշտոնից կամ դիրքից։ Տվյալ քահանան իր պարտականությունն էր կատարում, և ծառայությունն անցավ բավականին հագեցած։ Շնորհակալ ենք իրեն դրա համար»,– ասել է Թովմասյանը։

Նա հավելել է, որ պատարագներին մասնակցում է սեփական ցանկությամբ։ «Ես իմ կամքով եմ մասնակցում այն պատարագներին, որոնց ցանկանում եմ, և հավանաբար կշարունակեմ մասնակցել»,– նշել է պաշտոնյան։

Անդրադառնալով հարցին՝ կմասնակցի՞ արդյոք վարչապետ Նիկոլ Փաշինյանի «Վեհարանը՝ Վեհին» նախաձեռնությանը, Թովմասյանը պատասխանել է, որ Վեհարանը պետք է գործի սահմանված կարգերի և ընթացակարգերի համաձայն։

Խոսելով Հովհաննավանքի սեփականության հարցի մասին՝ Թովմասյանը նշել է, որ Խորհրդային Միության փլուզումից հետո բոլոր հողերը հանդիսացել են Հայաստանի Հանրապետության սեփականություն։ Նրա խոսքով՝ կառավարության որոշումներով են հստակեցվել հողերի բաշխման և փոխանցման գործընթացները, այդ թվում՝ Հովհաննավանքի տարածքի հետ կապված։

«Հովհաննավանքի և՛ շենքի, և՛ հողամասի վերաբերյալ եղել են կառավարության որոշումներ, և բացառապես այդ որոշումների հիման վրա է անշարժ գույքը փոխանցվել Հայ Առաքելական Սուրբ Եկեղեցուն։ Դետալները չհիշելով՝ չեմ կարող ասել՝ օգտագործման, թե սեփականության իրավունքով»,– ասել է նա։

Թովմասյանը նաև նշել է, որ Հայաստանում կա շուրջ 600–700 եկեղեցապատկան անշարժ գույք, որոնց մի մասը ազատված է գույքահարկից և հողի հարկից, իսկ մյուսները՝ ոչ։