ՀԷՑ-ի վարույթը շարունակվում է. կառավարման ժամանակ խնդիրներ չեն արձանագրվել. Մեսրոպյան
Էլեկտրաէներգիայի մատակարարման և բաշխման ծառայությունը դեռևս չի անցել հանրային կառավարման։ ՀԾԿՀ նախագահի որոշմամբ՝ վարույթի շրջանակում «Հայաստանի էլեկտրական ցանցեր» ընկերությունում նշանակվել է ժամանակավոր կառավարիչ։ Այդ մասին ԱԺ մշտական հանձնաժողովների համատեղ նիստում հայտարարեց ՀԾԿՀ նախագահ Մեսրոպ Մեսրոպյանը՝ պատասխանելով «Քաղաքացիական պայմանագիր» խմբակցության պատգամավոր Սերգեյ Բագրատյանի հարցին։
Մեսրոպ Մեսրոպյանը նշեց, որ ՀԷՑ-ի մասով վարույթն ընթացքի մեջ է, ուստի մանրամասներ չներկայացրեց, սակայն ընդգծեց, որ կառավարման ընթացքում որևէ արտառոց իրավիճակ չի արձանագրվել։
«Դիտարկվող ժամանակահատվածում՝ այս չորս ամիսների ընթացքում, որևէ արտառոց իրավիճակ՝ կառավարման, մենեջմենթի կամ տեխնիկական սպասարկման առումով, ՀԾԿՀ-ն չի արձանագրել։ Դա արտացոլում է նաև իրական պատկերը»,- ասաց նա։
Հիշեցնենք, որ Ազգային ժողովն ավելի վաղ ընդունել էր նախագիծ, որը պետությանը հնարավորություն է տալիս միջամտելու ՀԷՑ-ի կառավարմանը՝ վտանգի բարձր հավանականության դեպքում ապահովելու համար էներգամատակարարման կայունությունը։
ՀՀ վարչապետի որոշմամբ՝ Պետական վերահսկողական ծառայության նախկին ղեկավար Ռոմանոս Պետրոսյանը նշանակվել է ՀԷՑ-ի ժամանակավոր կառավարիչ։
