3-ամյա Տիգրանի որոնողական աշխատանքների վերաբերյալ ՆԳՆ ՓԾ-ն մանրամասներ է ներկայացրել

ՆԳՆ-ի և կամավորների ավելի քան 500 ներկայացուցիչ մասնակցում է Ծափաթաղ գյուղի շրջակայքում ընթացող որոնումներին:

Գեղարքունիքի մարզի Ծափաթաղ գյուղի բնակիչ, 3-ամյա Տիգրան Օվանեսովի որոնողական աշխատանքները շարունակվում են։ Ներքին գործերի նախարարության տվյալներով՝ ժամը 12։30-ի դրությամբ որոնումները դեռ արդյունք չեն տվել։

Աշխատանքներին ներգրավված են ՆԳՆ Քրեական ոստիկանության գլխավոր վարչության, Գեղարքունիքի մարզային վարչության և մարզի հինգ համայնքային բաժինների շուրջ 150 ոստիկաններ, ինչպես նաև Փրկարար ծառայության 150 աշխատակիցներ։ Դեպքի վայրում են նաև կինոլոգներ, օգտագործվում են անօդաչու թռչող սարքեր և տարբեր տեխնիկական միջոցներ։

Փրկարար ծառայությունը հաղորդում է, որ որոնումներին միացել են նաև Ծափաթաղ գյուղի, հարակից բնակավայրերի բնակիչներ և մարզի տարբեր համայնքներից ժամանած շուրջ 200 կամավոր։

Աշխատանքները շարունակվում են ամբողջ օրը՝ նպատակ ունենալով հնարավորինս արագ հայտնաբերել անչափահասին։