Պետություն-եկեղեցի հակասություն չկա, խնդիրը առանձին եկեղեցականների վարքագծի մեջ է. Արթուր Հովհաննիսյան
«Քաղաքացիական պայմանագիր» խմբակցության քարտուղարը հայտարարել է, որ եկեղեցու և իշխանության միջև հակամարտություն չկա, իսկ խնդիրները վերաբերում են որոշ հոգևորականների վարքին:
Ազգային ժողովի «Քաղաքացիական պայմանագիր» խմբակցության քարտուղար Արթուր Հովհաննիսյանը խորհրդարանական ճեպազրույցի ընթացքում նշել է, որ պետության և եկեղեցու միջև հակասություն գոյություն չունի։ Նրա խոսքով՝ խոսքը վերաբերում է Հայ Առաքելական Սուրբ եկեղեցու որոշ բարձրաստիճան հոգևորականների վարքագծին։
«Չկա իշխանություն-եկեղեցի կամ պետություն-եկեղեցի հակասություն։ Խնդիր կա որոշ եկեղեցականների հետ, որոնք խախտել են Աստծուն տված իրենց ուխտը։ Մենք եկեղեցու հետ խնդիր չունենք, մենք խնդիր ունենք նրանց հետ, ովքեր իրենց վարքով նսեմացնում են արժեքները»,– հայտարարել է Հովհաննիսյանը՝ նկատի ունենալով նաև Կտրիճ Ներսիսյանին և նրա շրջապատին։
Պատգամավորը նշել է, որ վարչապետ Նիկոլ Փաշինյանը ներկայացրել է գործողությունների հաջորդականությունը՝ նպատակ ունենալով «հոգևոր իշխանությունը վերադարձնել ժողովրդին»՝ եղբայրական մթնոլորտում և խորհրդակցությունների միջոցով։
Հարցին, թե հնարավոր է արդյոք հանդիպում Վեհափառ Հայրապետի և վարչապետ Փաշինյանի միջև, Հովհաննիսյանը պատասխանել է, որ դա մեծապես կախված է հոգևոր առաջնորդների վարքագծից։ Նրա խոսքով՝ կուսակրոնության ուխտը խախտած հոգևորականները պետք է հեռանան եկեղեցուց, և այդ հարցում երկխոսություն հնարավոր չէ։
